Иргэд хувиараа ашигт малтмал олборлох үйл ажиллагаатай танилцах, химийн хорт бодисоор бохирдсон талбайг саармагжуулах, цэвэрлэхтэй холбогдсон асуудлыг газар дээр нь судлах ажлаар Монгол улсын Засгийн газрын шадар сайд М.Энхболд тэргүүтэй ажлын хэсэг Төв аймгийн Борнуур, Жаргалант сумдад 03 сарын 26; 27-ны өдрүүдэд ажиллав.

Ажлын хэсэг Борнуур суманд ажиллах явцад УМХГ-ын Байгаль орчин, геологи, уул уурхай, цацрагийн хяналтын улсын албаны дарга Б.Саран тэргүүтэй ажилтнууд тус сумын Харганын алтны уурхайд "Тогтвортой бичил уурхай" төслийн ажлын хүрээнд байгуулагдсан бичил уурхайн лабораторийн багаж төхөөрөмжтэй танилцаж цианидаар бохирдсон байж болзошгүй 10 ш дээжинд тус лабораторийн "HANNA" багажаар шинжилгээ хийж үзэхэд цианид илрээгүй байна. Цианид натрийн 0.1 хувийн агуулга бүхий стандарт дээжийг уг багажаар шинжлэхэд цианид натрийн агуулгыг зөв тодорхойлсон байна.